Kreu i LDK-së, Isa Mustafa, nuk e fsheh dëshirën për t’u zgjedhur president i Kosovës, teksa shprehet se këtë çështje duhet ta diskutojë me strukturat e brendshme të partisë.
Ish-kryeministri i Kosovës shtoi më tej se ai nuk mund të imponojë dëshirën e tij dhe se ky vendim i takon parlamentit të ri.
“Është një nder i veçantë që dikush ta mbyllë karrierën e vet politike me një përgjegjësi ndaj qytetarëve të Republikës së Kosovës, mirëpo nuk jam unë ai që mund ta bëjë veten president, e as që do ta imponoj veten si president të vendit. Ne do të ulemi me letër të bardhë përpara pa asnjë kusht, askush nuk mund të thotë që ‘eja të ulemi në tavolinë, por tri ministri i kam ndarë për vete derisa shtatë tjera nga dhjetë janë të hapura për negociata”, tha ai.
Hashim Thaçi është presidenti aktual i Kosovës, mandati i të cilit përfundon në vitin 2021.
