Koronavirusi vijon të marrë qindra jetë njerëzish çdo ditë, nga vende të ndryshme të botës.
Situata duket më e rëndë në Itali, ku vetëm ditën e djeshme u konfirmuan 475 viktima të reja nga ky virus. Rritje të numrit të viktimave po njeh edhe Irani, i cili bën me dije se vetëm në 24 orët e fundit kanë humbur jetën 149 persona.
Ky është numri më i madh i viktimave i shënuar brenda një dite në Iran, që nga fillimi i shpërthimit të koronavirusit.
Ndërkohë një deklaratë e bërë së fundmi nga zëdhënësi i Ministrisë së Shëndetit të Iranit, Kianoush Jahanpour, ka tronditur opinion publik.
Përmes një postimi në Twitter, Jahanpour shprehet se çdo 10 minuta, një iranian vritet nga koronavirusi.
Deri më tani në Iran janë shënuar 1,284 viktima nga virusi vdekjeprurës. Ndërkohë numri total i të infektuarve raportohet të ketë shkuar në 18,047.
Irani është një nga 4 vendet më të prekura në botë nga koronavirusi, bashkë me Kinën, Italinë dhe Korenë e Jugut.
