Këshilli i Lartë i Prokurorisë ka zhvilluar sot intervista me 4 kandidatë për Prokurorinë Speciale Antikorrupsion (SPAK). Intervistat e 4 prokurorëve u zhvilluan me dyer të mbyllura, dhe pa praninë e mediave. Në një prononcim për mediat, kreu i KLP-së, Gent Ibrahimi, tha se të gjitha intervistat janë regjistruar me audio dhe me video, por nuk do të bëhen publike. Sipas tij, regjistrimet e intervistave janë pjesë e procesit administrativ që do të përdoren në rastet kur kandidatët apelojnë vendimin e Këshillit të Lartë të Prokurorisë.
I pyetur nga gazetarët, Ibrahimi pranoi se kandidatët janë pyetur edhe për çështje ‘të nxehta’ që janë në proces. “Intervista ka shumë vlerë. KLP e ka treguar me fakte që ne jemi të prirur të jemi të hapur. Ajo ç’ka ndodhi sot, pra intervistimi është një pjesë e një procesi administrativ me 3 etapa.
Këto regjistrime do përdoren edhe nëse kandidatët ankohen. Ne duam të marrim më të mirën, të dimë si reagojnë ata në raste të rëndësishme, janë diskutuar edhe çështje me procese penale, disa edhe të famshme. Ne morëm përgjigjet e tyre lidhur me mënyrën se si kanë reaguar”.
Ai konfirmoi se në këtë proces do jenë të përfshirë edhe ndërkombëtarët.
