Analisti Andi Bushati ka hedhur dyshime se Klodian Zoto, apo siç njihet ndryshe si “bosi” i inceneratorëve, i cili është shpallur në kërkim nga drejtësia për aferë korruptive, është lajmëruar nga autoritetet se do të arrestohej. Në emisionin “Të Paekspozuarit”, Bushati tha se Zoto i ka patur zyrat ngjitur me ato të redaksisë së medias që ai drejton, dhe se është dëshmitar që ai është larguar nga kjo zyrë rreth një muaj para urdhër arrestit. Ai tha se Zoto ishte njoftuar nga një person se çfarë mund t’i ndodhte, ndaj dhe mbylli zyrën e tij.
“Zyrën e Klodian Zotos, unë e kam patur ngjitur. Na ndante një mur me zyrën e Lapsit. Një muaj përpara ka mbledhur plaçkat, ka ikur. U mbyll zyra, pra një njeri që e dinte shumë mirë se çfarë do ndodhte pas një muaji.
Tani ky nuk është automatikisht fakt, por çdo njeri që ka mend në kokë, të paktën e ngre një dyshim. Ore burri botës kishte katër vjet atje, si iku një muaj para se SPAK-u, ta arrestonte? Rastësi?”, tha Bushati.
Klodian Zoto është shpallur në kërkim për përfshirjen në mega-aferën e inceneratorit të Elbasanit.
