Besimtarët e krishterë në të gjithë botën kremtojnë Krishtlindjen. Besimtarët shkëmbyen urime për më shumë paqe, lumturi dhe harmoni. Në Tiranë kulmoi në mesnatë me meshën që u mbajt në katedralen e “Shën Palit”. Qindra besimtarë iu drejtuan katedrales duke u lutur për paqe, mbarësi e dashuri. Mesha u kremtua nga Arqipeshkvi Imzot George Frendo, i cili uroi besimtarët katolikë për më shumë paqe, dashuri dhe mirësi.
Në fjalën e tij, ai theksin e vendosi te solidariteti që treguan shqiptarët për të prekurit pas tërmetit tragjik të 26 nëntorit. Ai tha se shqiptarët e kanë të shkruar në ballë dhe në zemër solidaritetin. Por, ai kishte edhe një apel për të gjithë ata që po përfitojnë nga ky moment tragjedie. Mesazhi vinte në drejtim të të gjithë atyre që abuzojnë duke rritur çmimet e qirave për banesat.
“Çfarë po ndodh në këtë orë në kishat që janë plot me njerëz? Zakonisht në këtë orë njerëzit janë në gjumë, apo disa të rinj në diskotekë, çfarë po ndodh që këta njerëz drejtohej drejt kishës? Kanë dëgjuar fjalën e engjëjve. Festa e Krishtlindjes është festa e plotë e solidaritetit. Solidar me ata që për shkak të tërmetit të 26 nëntorit kanë humbur gjithçka dhe kanë mbetur pa shtëpi. Jezusi që sot na mëson se çfarë do të thotë solidaritet, gëzohet duke parë solidaritetin që populli shqiptar ka treguar ndaj personave të prekur nga tërmeti. Vëllezërit dhe motrat shqiptare kanë treguar solidaritet dhe shumë u janë afruar personave që kanë mbetur pa shtëpi.
Solidariteti bën pjesë te ADN-ja shqiptare, e kanë të shkruar në ballin dhe zemrën e tyre. Sa bukur kjo shoqëri, dëshmoi këtë solidaritet të jashtëzakonshëm, por kam një pyetje. A jemi të gjithë duke treguar këtë solidaritet ndaj viktimave të këtyre tragjedie? Jo, jam ndjerë shumë i zhgënjyer që dëgjova se ka disa që po abuzojnë, që kanë rritur qiratë, dhe për kë? Për njerëz që në këtë fatkeqësi kërkojnë një vendstrehim, po rrisnin çmimet e materiale që duhen për ndërtimet, është mëkat i madh, të përfitojnë nga kjo tragjedi për të fituar. U drejtohem atyre që po pasurohen dhe korruptojnë në sajë të tërmetit. U drejtohem me fjalët; qani dhe vajtoni për të këqijat që do vijnë mbi ju”, tha ai.
Në përfundim të meshës besimtarët uruan njëri-tjetrin për sa më shumë mirësi dhe begati.
