Monika Kryemadhi dhe Ilir Meta janë çift jo vetëm në jetën sentimentale, por edhe në atë profesionale. Me ta gjen vend shprehja: “Burrë e grua, mish e thua”. Ndryshe nga çfarë të ofron Kuvendi, ku palët ‘çirren’ për të mbrojtur qëndrimet e tyre, posti i Metës është si një urë lidhëse, që të ofron paqe. Por, një ditë jashtë politikës nuk kishte si të mos i bënte bashkë Monën me Metën, ku kanë drekuar pranë miqve të tyre më të mirë, e njëkohësisht njerëzve të cilët kanë dhënë një kontribut në LSI.
Presidenti Meta ka lënë për pak çaste zyrën e tij të Presidencës, për të qenë pjesë e gëzimit familjar të deputetit të LSI-së, Lefter Koka. Meta së bashku me Kryemadhin dhe një sërë deputetësh të tjerë të LSI-së, në një tryezë në natyrë, kanë kaluar momente relaksi.
Ka qenë deputeti i LSI në Shkodër, Agron Çela, ai që ka ndarë dhe disa foto nga ky takim, ku thotë se solidariteti dhe miqësia e mban bashkë LSI-në.
“Solidariteti e miqësia e mban gjithnjë bashkë dhe e bën më të bukur marrëdhënien brenda grupit parlamentar të LSI-së, gjë që u shfaq me shumë kolorit e spontanitet në një gëzim familjar të mikut e kolegut tonë Lefter Koka.
Në një mjedis fantastik mes gjelbërimit të pemëve, e në një vreshtë të kultivuar mjeshtërisht, u mblodhëm, festuam e gëzuam si në një familje.
Faleminderit Teri për respektin që na bëre e kënaqësinë që na dhe, e kështu në gëzime u mbledhshim gjithmonë!”, shkruhet bashkëngjitur fotove në fjalë.
