Instituti i Gjeoshkencave, Energjisë, Ujit dhe Mjedisit, ende nuk ka përcaktuar se sa ballë ishin lëkundjet sizmike të 26 nëntorit. Sizmologu Llambro Duni është shprehur për “abcnews.al” se kolegët po merren me vlerësimin e saktë. Pra, gjithë informacioni që është mbledhur nga inxhinierët, do të përpunohet dhe do të dalë një vlerësim i saktë.
“Ballët janë duke u punuar, kolegët po merren me vlerësinim e saktë. Për të vlerësuar efektin në ballë të tërmetit, duhet të dimë efektin në sipërfaqe. Balli vlerësohet në bazë të fakteve që le tërmeti në sipërfaqen e tokës. Gjithë informacioni që është mbledhur nga inxhinierët, do të përpunohet dhe do të dalë një vlerësim i saktë”, tha sizmologu Duni.
Për shkak të ndërprerjes se energjisë elektrike, aparatura në Durrës nuk ka regjistruar të plotë vijueshmërinë e lëkundjes së tokës më 26 nëntor. “Kemi vetëm 15 sekondat e para të regjistrimit, më pas ka pasur një ndërprerje të energjisë”, u shpreh Duni.
Duni shtoi më tej se stacione të tjera kanë të dhëna për ngjarjen sizmike. “Kemi regjistrime të tërmeteve gjithandej, por do ishte mirë që ta kishim të gjithë regjistrimin”, tha ai. “Pothuajse 80% e pasgoditjeve janë tërmete të pandjeshëm”, deklaroi sizmologu.
