Është shoqëruar me debate të forta mbledhja e sotme në Komisionin e Ekonomisë, ku po diskutohej projekti i Portit të Durrësit. Debatet nisën pasi deputetët e opozitës kërkuan që në Komision të vijë ministrja Delina Ibrahimaj, pasi po diskutohej për Portin e ri të Durrësit.
Deputeti socialist Erion Braçe teksa fliste për këtë marrëveshje, pohoi se për këtë çështje s’ka asgjë për t’u fshehur, ndërsa u kap me Edmond Spahon nga PD, i cili ka ndërhyrë gjatë fjalës së tij duke folur pa mikrofon. Braçe shkoi deri aty sa i tha Spahos. “Ik pirdhu!”. Nga ana tjetër deputeti i PD-së i kërkoi të tërheqë fjalët mbrapsht.
Debati
Edmond Spaho: Të vijë ministrja
Erion Braçe: E pirdhu. Të vijë ministrja thotë. Për çfarë të vijë, që të shash ti?!
Edmond Spaho: Nuk e shaj unë. Të japë përgjigje. Ka përgjegjësi penale kjo punë
Erion Braçe: Po boll ore. Do vijë këtu por jo për ta sharë ti. Sa ke hyrë këtu vetëm ke sharë
Erion Braçe: Me gjuhën e Sali Berishës mos hajde më këtu. Po boll ore. E dua ministren që ta shaj
(Braçe i bie tavolinës disa herë)
Spaho u përplas dhe me Eduart Shalsin.
Edmond Spaho: Normale është që këtu të vijnë ta mbrojnë projektin ata që kanë firmosur, ministrja e Financave dhe zv kryeministrja. Ta kalosh këtë projekt me zv sekretaren ë Përgjithshme, me drejtorin e Portit është shumë qesharake. Na e kurseni këtë komendinë se s’kemi nevojë për të. Ne do flasim për implikimet ekonomike financiare.
Eduard Shalsi: Në Konferencën e Kryetarëve është marrë një vendim dhe titullarët më të lartë janë ftuar në komisonet përgjegjëse nuk po bëjmë ndonjë procedurë. E theksoj që tradita parlamentare.
Edmond Spaho: Po c’a tradite parlamentare. E kemi dëgjuar pafund. Nëse inceneratorët janë vjedhja e shekullit kjo është vjedhja e gjithë historisë. Hidrauliku i Kryeminitrisë… nuk është serioze kjo që po bëni.
Eduard Shalsi: Të të vijë turp që thua hidrauliku i Kryeministrisë
Edmond Spaho: Unë mbroj interesin e vendit
Eduard Shalsi: Me këtë gjuhë aspak etike
Edmond Spaho: Ju jeni hajdutër të paskrupullt e më tregon mua etikën
Eduard Shalsi: Gjuhë aspak etike. E kuptoj që ke ardhur …
Edmond Spaho: Po vidhni për të ndërtuar pallate, për të shitur Rama pallate
Eduard Shalsi: E kuptoj që e keni humbur qetësinë, nuk keni faj është miomenti për të celebruar ardhjen e një investitori të madh
Spaho: Që vjedh bashkë me ju, ju jeni hajdutët më të mëdhenj se atë e keni maskë
Eduard Shalsi: Ai që do të të hapë ty sytë si investitor. Kam një kërkesë, mbaji mend këto që po thua. Të paaftë për të analizuar. Nuk është në nderin tonë me akuza e ofendime si ato në hyrje të celjes së diskutimeve
Edmond Spaho: Ju ka shkel Edi Rama me këmbë.
Jorida Tabaku: Nga e dini ju që kemi lexuar apo jo? Kërkesa për të thirrur këtu dy ministra është shumë normale, duam të dëgjojmë personat politik që kanë negociuar.
