Itali vijon të vuajë pasojat e rënda që po sjell përhapja e koronavirusit në vend.
Kreu i Mbrojtjes Civile, Borrelli bën me dije se 475 persona të tjerë kanë humbur jetën si pasojë e virusit në 24 orët e fundit. Kështu numri total i viktimave të shënuara nga koronavirusi në këtë vend shkon në 2,978.
Më shumë se 2,600 raste të reja janë regjistruar në orët e fundit, duke e çuar në rreth 35 mijë numrin total të të infektuarve.
Emergjenca nga përhapja e shpejtë e koronavirusit ka vendosur në vështirësi shëndetësinë në Itali. Pandemia ka goditur kryesisht veriun, me rajonin e Lombardisë që rezulton më i prekuri.
“Për fat të keq rastet e reja me të infektuar nuk po reduktohen, përkundrazi vijojnë të jenë tepër të larta. Shumë shpejt nuk do të jemi në gjendje të kurojmë të dashurit tanë”, kështu u shpreh presidenti i rajonit të Lombardisë, Attilio Fontana.
Ekspertët paralajmërojnë se nëse deri të dielën nuk ulen shifrat e të infektuarve nga Covid-19, qeveria duhet që të ashpërsojë masat e sigurisë për të frenuar përhapjen e këtij virusi të rrezikshëm.
Kujtojmë se një numër aq i madh viktimash brenda një dite nga koronavirusi nuk është regjistruar as në Kinë, e cila deri më tani mban “rekordin” për numrin më të madh të viktimave të shënuara nga ky virus, që nga përhapja e tij.
