Vëllai i Ragip Hajdinit, i njohur si “Daja” i Rinasit, ka folur sot për mediat në lidhje me arrestimin e të vëllait. Ai tha se vëllai i tij ka rënë viktimë, pasi është arrestuar se mori pjesë në varrimin e Admir Murataj.
“Policia s’na ka kontrolluar. S’vjen dot të më kontrollojë mua, kur jam i pastër. Punoj me djersën e ballit. Ai është viktimë.
Është arrestuar se mori pjesë në varrimin e Admirit. Po në varrim isha edhe unë. Kur tjetri të vjen në dasmë, ti i shkon në mort”, tha Mustafa Hajdini.
Ai u shpreh më tej se nuk është njoftuar zyrtarisht për arrestimin e vëllait të tij, dhe se policia nuk ka bërë kontrolle në banesën e tij. “Asnjë nuk më ka njoftuar. Ragipi jeton në shtëpi të tij, unë në shtëpi time. Jetojmë në një pallat, por ai ka shtëpinë e tij, ai të vetën. Kur unë jam i pastër, nuk mundet me më kontrolluar në shtëpinë time, nuk ka ardhur për kontroll policia”, përfundoi Mustafa Hajdini, i cili ka marrë avokat për të vëllain.
Ragip Hajdini u zbulua nga dëshmia e bashkëpunëtorit të drejtësisë, Alkond Bengasi, i arrestuar për modifikimin e furgonit me mbishkrimin “Hetimi Tatimor”.
