Ish-kryeministri Sali Berisha ka zbuluar detaje të tjera lidhur me ngjarjet që kanë ndodhur para ekzekutimit të liderit të lëvizjes studentore, Azem Hajdari.
Në një lidhje live me emisionin “Opinion”, Berisha u shpreh se Hajdari nuk kishte asgjë personale me bandën e Haklajve, teksa thekson se ai u vra nga shteti.
Më tej, ish-kryeministri ka treguar edhe këshillat që i ka dhënë Hajdarit, para se të ekzekutohej. Sipas Berishës, ai i ka kërkuar Hajdarit që të largohej për 6 muaj diku, në mënyrë që të shmangte përplasjet me Haklajt.
“Sigurisht, Azemi nuk kishte asnjë problem personale me bandën e Haklajve. Ai shkoi në Tropojë i dhanë 140 plumba, në qershor. Erdhën afër degës së punëve të brendshme i zunë pusi, iu shpëtoi. Ky ishte një urdhër politikë për të asgjësuar Azemin. Unë i kam thënë Azem mirë është të zhdukesh 6 muaj diku. Ka dy mënyra ose të fshihet ose të qëllosh, por kjo nuk ishte rruga jonë. Azemit i kishin dalë në pritë edhe tek shtëpia, ata ishin vrasësit e shtetit”, tha ai.
