Presidenti Ilir Meta, në deklaratat e tij disa herë, është shprehur i shqetësuar për pluralizmin në vend, si pasojë e situatës politike.
Kryeministri Rama i ka kthyer përgjigje presidentit gjatë takimit të tij elektoral në Konispol, ku nuk la pa përmendur përgjimet e publikuara nga Bild.
“E kam dëgjuar edhe Metën të përsërisë se është i shqetësuar për pluralizmin. Pluralizmi, është dakordësia e të gjithëve që populli zgjedh me votë, po gjithsecili e ka në dorë të hyjë a të mos hyjë për të marrë votën. Ata e vendosën vetë”, u shpreh kryeministri Rama.
Sa i përket përgjimeve, Rama deklaroi se politika ka qenë e lidhur si pjesë e planit me shfrytëzimin e asaj ‘shpifsire’ dhe nëse ato janë arsye për hetim, atëherë e vërteta do të kishte dalë që në 2016.
Deklarata e plotë:
“Këtu është një garë pa kandidat përballë, edhe pse po të ishte, mund edhe të mos fitonte. Siç do ndodhte edhe me Lulin që edhe vetëm po të ishte në zgjedhje s’do i fitonte. Po kjo nuk është zgjedhje jonë. S’i kemi penguar ne, është vendimmarrja e tyre.
E kam dëgjuar edhe Metën të përsërisë se është i shqetësuar për pluralizmin. Pluralizmi, është dakordësia e të gjithëve që populli zgjedh me votë, po gjithsecili e ka në dorë të hy a të mos hy për të marrë votën. Ata e vendosën vetë. S’i kanë bërë nder Shqipërisë me këtë vendim, po Shqipëria do e kapërcejë këtë situatë të vështire, e ata do të humbasin. S’ka njeri që të të falë që të ka dhënë votën ti të marrësh mandatin e ta përdorësh si një leckë, e të dalësh në rrugë e të hedhësh njerëz o budallenj o të sinqertë ti bien murit me kokë e të përfundojë burgjeve.
Këtë të jeni të sigurt gjithë shqiptarët e ndershëm nuk kanë për ta falur. Kjo është pjesë e një plani ogurzi për t’i bërë Shqipërisë një të zezë duke e kthyer në njollë që tërheq vëmendje e shkakton ndjenja negative. Pse ndodh kjo? Pse u larguan nga zgjedhjet? Pse morën ato përgjimet e shpifura e i ruajtën për këtë periudhë, Pse dalin në Gjermani? Sepse nëse janë arsye për hetim kanë që në 2016, duhet të dilte e vërteta. Politika ka qenë e lidhur si pjesë e planit me shfrytëzimin e asaj shpifsire. Kjo për të gjithë ata që kanë sy për të parë e vesh për të dëgjuar. Për fat populli mund të ketë shumë gjëra jo të mjaftueshme, por po qe puna për politikë është kampion bote”.
