Nostalgjikët e mbrojnë Enver Hoxhën nga akuzat për shitje të çështjes kombëtare, duke pretenduar se ai e deshte Kosovën. Por mësuesi nga Librazhdi Gani Skura, kaloi 10 vite në burg.
Vetëm pse i kërkoi udhëheqjes komuniste të angazhohej për bashkimin e trojeve etnike shqiptare. Gani Skura nga Pishkashi i Librazhdit lindi në vitin 1936, në një familje me tradita atdhetare.
Pas përfundimit të shkollës pedagogjike, punoi si mësues në fshatin e tij të lindjes dhe në fshatra të tjerë të zonës. Nisi të shkruajë poezi dhe të angazhohet si korrespondent vullnetar i gazetave “Drita” “Bashkimi”, “Zëri i Rinisë” dhe “Zëri i popullit”.
Më 12 Gusht 1965, Ganiu, i dërgon një letër të hapur, udhëheqësve të asaj kohe, Enver Hoxha e Haxhi Lleshit, ku u kërkon që të merret në mbrojtje Kosova e Çamëria në arenën ndërkombëtare.
Fillimisht e thirrën urgjent në Komitetin e Partisë së Punës, i heqin vërejtje dhe e këshillojnë të heqë dorë. Por një vit më vonë, Skura i drejtohet përsëri Presidiumit të Kuvendit Popullor, për nevojën e publikimit të hartës etnike të Shqipërisë. Që brezi i ri të kishte mundësi të mësonte se sa tokë i është marrë padrejtësisht dhe me dhunë atdheut.
Pas këtyre letrave, Skura vihet nën survejimin e Sigurimit të Shtetit, derisa arrestohet më 4 korrik 1973 me akuzën e “agjitacionit dhe propagandës kundra partisë dhe shtetit”. Dënohet më 10 vite burg, që i kaloi në burgun e Spaçit. Vdes në vitin 2002, në moshën 66-vjeçare.
