Aktorja e njohur, njëkohësisht dhe deputetja e Kosovës, Adriana Matoshi, njoftoi miqtë e ndjekësit e saj një ditë më parë me anë të një statusi në rrjetet sociale, se pas 9 vitesh i ishte rikthyer sërish tumori në tru. Shumë personazhe të njohur dolën publikisht në mbështetje të saj, për t’i dhënë kurajon dhe forcën që i nevojtitet në këto momente të vështira.
Sot njoftohet se grupe të ndryshme qytetarësh, do të bëjnë një ecje solidarizimi për aktoren dhe deputeten. Sipas njoftimit, ecja do të mbahet nga sheshi “Zahir Pajaziti” deri te Teatri Kombëtar i Prishtinës, duke filluar në orën 12:00. “Në nder të aktores së mirënjohur dhe shumë të dashur për gjithë publikun shqipfolës, Adriana Matoshi e cila përsëri u diagnostikua me tumor në tru, organizohet ecja nga sheshi “Zahir Pajaziti” deri te Teatri Kombëtar në Prishtinë. Duam që me anë të kësaj ecje, të solidarizohemi me sfidën e Adrianës, për të cilën lutemi të gjithë që ta fitojë si çdo peripeci që e ka kaluar në jetë”, thuhet në njoftim.
