Familja e të resë e cila u vra nga ish-bashkëshorti, do denoncojë në SPAK gjyqtarin dhe prokurorin që ka lënë të lirë më herët vrasësin. I ati i Sabrina Bengajt, Partizan Bengaj, ka thënë se do të padisë në SPAK ata që mundësuan lirimin e vrasësit të vajzës së tij.
“Unë po autorizoj avokatin që në SPAK të përfaqësoj që të denoncojë të gjithë ata që janë përfshirë në lirimin e vrasësit të vajzës sime”, tha ai.
Sa i përket akuzave se ai e ka kërcënuar ish-dhëndrin e tij, Bengaj thotë se në atë periudhë ka qenë në Itali dhe akuzat janë totalisht të pavërteta.
Avokati Vishaj u shpreh se do të studiohet e gjithë dosja, për të parë të gjitha përgjegjësitë. “Është një ngjarje shumë e rëndë. Në do të shikojmë se çfarë do të bëjmë pasi të shikojmë të gjithë dosjen”, tha avokati Vishaj.
Sabrina Bengaj u vra nga ish-burri i saj Elton Meta, duke lënë pas një fëmijë të vogël. Meta u arratis menjëherë pas ngjarjes, por kjo arrati nuk i zgjati shumë. Ai u arrestua pas 3 orë ndjekje, i fshehur në një pyll në fshatin e tij në Peshtan të Fierit, ku iu gjet edhe arma e krimit.
Skandali me drejtësinë shqiptare
Ekzekutimi nxori në pah edhe skandalin e drejtësisë shqiptare, ku Meta ndonëse terrorizoi për më shumë se 5 orë familjen Bengaj një vit më parë, nuk bëri asnjë ditë burg, pasi gjyqtari Piro Sota dhe prokurori Çlirim Sino, nuk e dënuan me asnjë ditë burg, por e shtruan në spitalin burg të Zaharisë. Prej aty, vetëm pak muaj me vonë u nxor me argumentin se do të vazhdonte kurimin në shtëpi.
