Autoritetet greke kanë dalë në përfundimin, se në krim për vrasjen e 20-vjeçares Caroline Crouch në muajin maj në Greqi është i shoqi 33-vjeçar, Babis Anagnostopoulos. Në këtë ngjarje, nuk kishte të përfshirë asnjë person të dytë.
Avokati i pilotit është thirrur nga hetuesi, për të nënshkruar përfundimin e hetimeve. Nga sa raportohet, hetuesit nuk nxorën asnjë provë të re nga procesi për verifikimin e telefonit dhe llogarisë bankare.
Ata nuk kanë asnjë informacion shtesë në lidhje me thirrjet e bëra natën kur u vra nëna e re, në sy të foshnjës së saj. Ndërsa kompania nga Kina nuk u përgjigj kurrë ndaj kërkesës së autoriteteve greke, në lidhje me pamjet nga karta e kamerave të sigurisë. Dosja pritet t’i përcillet prokurorit, për të paraqitur propozimin në Këshillin Gjyqësor në lidhje me dënimin e Babis.
Babis Anagnostopoulos i cili akuzohet për vrasjen e bashkëshortes së tij 20-vjeçare, është kthyer në një prej të burgosurve më famëkeq. Ai krijoi një skenar të tërë, që të dukej sikur Caroline ishte vrarë gjatë një grabitjeje në shtëpi. Mediat greke raportojnë se ai nuk pranon vizitorë në burg, dhe qëndron gjatë gjithë ditës në qelinë e tij duke shkruar dhe refuzon të dalë në oborrin e burgut. Ai ka frikë se mos fotografohet, dhe preferon të qëndrojë i distancuar nga të gjithë.
