Kryeparlamentarja e Kosovës, Vjosa Osmani ka pasur një përplasje me deputetin e listës serbe, Igor Simic, gjatë seancës së sotme parlamentare.
Simic akuzoi Osmanin se ka ndjekur deputetët serbë korridoreve të Kuvendit, për t’i siguruar votat për t’u zgjedhur në krye të Kuvendit.
Deputeti është shprehur kundër projekt-rezolutës së propozuar nga Osmani, duke e cilësuar si të papranueshme. Sipas tij, rezoluta shkel të drejtat e deputetëve të Listës Serbe për të vepruar në pajtim me interesat për qytetarët serb.
“Dua t’ju përkujtoj zonja kryetare se kur sulmoni në këtë mënyrë deputetët dhe ministrat e Listës Serbe, se në pozitën në të cilën jeni tash keni ardhur duke iu falënderuar veçmas votave të Listës Serbe. Po ua përkujtoj se në korridoret e kësaj ndërtese keni vrapuar që të siguroni dhjetë vota për zgjedhjen tuaj dhe atëherë nuk ishte në pyetje as politika e Listës Serbe dhe as veprimet e saj. Përnjëherë kjo ndryshoi dhe këtë ju mund ta shpjegoni”, tha ai.
Pas deklaratave të deputetit ka ardhur edhe reagimi i Osmanit, e cila ka mohuar të ketë kërkuar votën e Listës Serbe për t’u zgjidhur kryetare e Kuvendit.
“Unë kurrë në jetën time nuk e kam ndjekur askënd korridoreve për asnjë votë. Kjo është një gënjeshtër e madhe nga ana juaj. Nëse kur më keni votuar, keni menduar se unë do të përkrah këdo që i bashkohet presidentit Vuçiç në beteja diplomatike e politike, e keni pasur gabim. Të gjithë e dinë se s’keni votuar për mua si person, por për themelimin e institucioneve”, tha ajo.
