Eksperti i sigurisë rrugore, Gëzim Hoxha u shpreh se shqiptarët i japin keq makinës, ndërsa i cilësoi shoferët agresivë dhe shumë të nervozuar.
Teksa ishte i ftuar këtë të martë në emisionin “Ditë e Re”, Hoxha theksoi se sinjali duhet të hapet 100 metra përpara se të futesh në kryqëzim, por sipas tij, shqiptarët nuk e përdorin.
“Ka nga ata që ose hyjnë pa sinjal fare në kthesë ose e ndezin në momentin kur presin timonin për të marrë kthesën. Atëherë ka mbaruar gjithçka, ai që është mbrapa të ka rënë ty. Nuk përdoret sinjalistika, drejtuesit e mjeteve nuk janë të vëmendshëm dhe nuk dinë të kalojnë rrethrrotullimin. Rrethrrotullimet tona janë gjithmonë të bllokuara. Duhet të fillojmë të mendojmë të ndryshojmë mënyrën e të menduarit. Secili duhet të bëjë punën e tij dhe deri ku e kemi të drejtën tonë për të vepruar”, deklaroi Hoxha.
Po ashtu, eksperti u shpreh se Policia Rrugore ndikon 5% në parandalimin e aksidenteve.
“Ne nuk e dimë sa mund të arrijmë por po e marrim të mirëqenë 5%. Problemi jonë është se duhet të ndryshojmë metodologjinë e të menduarit. Pra nuk mundet të nxjerrim radarët në rrugë të drejtë për të kapur makinat sepse krijon idenë e një grabitqari dhe jo që unë ta dua policinë”, shtoi ai.
