Nga Anxhela Ferra
Në gjimnazet e kryeqytetit nuk është aspak e vështirë të gjesh të paktën një lokal pranë. Janë lokale të cilat mbushen që në orët e para të mëngjesit, kryesisht me nxënës. Në një vëzhgim të kryer nga Tirana Today, ata lënë më së shumti orët e para, për të pirë kafen e mëngjesit, shoqëruar edhe me cigare.
Gjimnazistët thonë se i braktisin shumë shpesh orët e mësimit, kryesisht pa dijeninë e prindërve.
“Me qindra herë e lëmë mësimin. Kot, për qejf. Tani do ikim te Liqeni dhe do luajmë volejboll me gocat e klasës. Orën e parë e lëmë gjithmonë. Prindërit normalisht që nuk e dinë. Dhe te shkolla na hapin ndonjëherë probleme e bëjnë si gore, por e rregullojmë disi.”
“U zgjova me vonesë dhe tani po shkoj në shkollë. Ndodh shpesh që e humbas orën e parë, sepse zgjohem me vonesë.”
Ndonjëherë klasat mbeten bosh
“Shumë herë nuk shkoj në shkollë. Më së shumti lë orën e matematikës dhe preferoj të dal të pi një freskuese apo të ha diçka. Prindërit e dinë dhe nuk më thonë gjë. Ka pasur shumë raste kur klasa ka mbetur pothuajse bosh, se nxënësit dilnin.”
“Si gjithë të tjerët edhe unë kam dalë, lija orë të ndryshme. Sidomos kur kishim për orë të parë ndonjë lëndë që ishte kot. Rrija në shtëpi dhe flija gjumë.”
Ndërkohë qytetarët shprehen për Tirana Today se prindërit e kanë shumë të vështirë të kujdesen pasi janë në punë. Për këtë arsye duhet një bashkëpunim dhe përkujdesje më e mirë mes tyre dhe mësuesve.
“Është një fenomen shumë i keq. Prindërit ikin që në mëngjes dhe nuk e dinë se çfarë bënë fëmija. Unë shoh vajza që nuk shkojnë fare në mësim dhe rrinë nëpër lokale. Duhet që çdo gjë të jetë në kontroll kryesisht nga prindërit dhe mësuesit, sidomos për vajzat.”
“Çfarë të bëjë prindi?! Ai është në punë dhe fëmijët në vend që të shkojnë në shkollë, dalin me shoqërinë. Në lokalet afër shkollave ka shumë nxënës që në mëngjes. I shohim që të gjithë janë me cigare në dorë. Është bërë modë tani. Në kohën tonë nuk guxoje të lije orë mësimi, ne kishim respekt për prindërit dhe mësuesit.” TIRANA TODAY
