Koronavirusi vijon të bëjë namin në Itali, teksa vetëm për 24 orët e fundit u raportuan 743 viktima të reja.
Situata është mjaft alarmante në shtetin fqinj teksa spitalet janë të mbingarkuara nga pacientët e shumtë.
Ndërkohë një histori frymëzuese vjen nga spitali “Lovre” i Bergamos, ku një prift i infektuar ka humbur jetën pasi ia dhuroi respiratorin e tij një pacienti më të ri në moshë.
Giuseppe Berardelli, 72 vjeç, ndërroi jetë në spitalin e Bergamos, i cili deri më tani është konsideruar vatra kryesore në Itali.
Mediat italiane bëjnë me dije se të paktën 50 priftërinj kanë humbur jetën në Itali, si pasojë e virusit Covid-19.
Koronavirusi ka shënuar shifra rekord viktimash në shtetin italian, teksa deri më tani janë raportuar 6,820 viktima.
Më shumë se 18 mijë persona kanë humbur jetën nga koronavirusi në të gjithë botën dhe 1/3 e tyre vetëm në Itali.
