Kryetari i Bashkisë së Vaut të Dejës, Mark Babani ka reaguar menjëherë pas akuzave të Partisë Demokratike, se ai ka qenë pjesë e një bande grabitësish në Siçili, ndërsa pretendon se është arrestuar në Itali në vitin 1994.
Përmes një deklarate për mediat, Babani ka hedhur poshtë këto akuza, teksa i konsideron të sajuara nga PD-ja me qëllim prishjen e imazhit.
Sakaq, kryebashkiaku pretendon se në 4 prill të 1994-ës, ka qenë në një hotel në Itali, ku edhe ishte i punësuar.
Ndër të tjera, ka paralajmëruar padi penale për Sekretarin e Përgjithshëm të PD-së, Gazment Bardhin, teksa shtoi se lekët e fituara nga gjyqi, do t’i çojë për rregullimin e shkollës së djegur nga opozita para 30 qershorit.
“Nuk ka lidhje me gjurmët e gishtërinjve të mi. Unë po pres padinë e prokurorisë, jam i gatshëm të shkoj të bëj të gjitha dëshmitë e mija. Ata po qe se kanë bërë padinë, pse po flasin në telefon
Në 4 prill të 1994 kam qenë në punë, në një hotel gjatë gjithë kësaj periudhe. Unë në jetën time s’kam qenë kurrë as i arrestum as i ndalum. Unë nuk kam asnjë person të fisit tim që ka emrin Saimir. Unë kam aktivizuar avokatët e mi që t’i bëjnë një denoncim zotit Bardhi, për shpifje ndaj meje. PS nuk më ka kërkuar informacion sepse unë kam bërë denoncimet siç duhet. As Rama dhe as PS nuk e dinë se çfarë kam bërë unë në jetën time. Atë e di unë dhe miqtë e mi”, deklaroi Babani.
