Elseid Hysaj pas ardhjes së Carlo Ancelottit në krye të Napolit e ka provuar disa herë shijen e stolit. Tekniku italian nuk e shihte si zgjedhje të parë mbrojtësin e kombëtares, por në ndeshjet e fundit duket se e ka bindur, pasi Hysaj ka shfaqur versionin më të mirë.
Shkodrani ka rifituar sërish vendin e titullarit në skuadër, ndërkohë që është i vlerësuar edhe për arsyen se 25-vjeçari mund të aktivizohet pa problem në të dyja krahët e mbrojtjes. Në këtë mënyrë zërat se Hysaj do të largohej nga Napoli po dëgjohen gjithnjë e më pak, teksa tashmë kanë filluar negociatat për rinovimin e kontratës. Së shpejti pritet një takim i agjentit të futbollistit me presidentin e Napolit, Aurelio De Laurenttis për të diskutuar më në hollësi detajet e marrëveshjes.
Nga rinovimi, shkodrani do të kërkojë edhe një rritje të rrogës, teksa shifra e vendosur në tavolinë nga menaxheri lojtarit është 3 milionë euro. Ndërkohë që, napolitanët ofrojnë deri në 2.5 milionë euro, megjithatë palët janë afër konsensusit, me Hysajn që do të konfirmonte cilësitë e tij dhe mund të rritej më shumë profesionalisht nën drejtimin e një trajneri si Carlo Ancelotti.
