Nga: Mero Baze
Beteja për hapjen e bisedimeve të Bashkimit Europian me Shqipërinë, tanimë nuk është mes Brukselit e Shqipërisë, por mes Brukselit në një anë, dhe Parisit e Amsterdamit në anën tjetër. Thirrja e sotme e zyrtarëve dhe përfaqësuesve më të lartë të Bashkimit Europian, drejtuar vendeve anëtare për të votuar hapjen e bisedimeve me Shqipërinë dhe Maqedoninë, është ilustrim i kësaj beteje.
Shqipëria dhe Maqedonia po presin 18 tetorin, të pafuqishme për ta ndryshuar fatin e tyre, duke qenë në dorë të Francës, e cila kërkon të ndalë hovin e zgjerimit të Europës dhe në dorë të Holandës, që ndjehet e bezdisur nga vende si Shqipëria.
Votimi në Bundestag pro Shqipërisë e Maqedonisë, dhe izolimi i problemit tek Franca dhe Holanda, e kthejnë 18 tetorin më shumë një ngjarje për Bashkimin Europian, se sa një ngjarje për dy vende të Ballkanit Perëndimor.
Por përtej kësaj, në Shqipëri opozita po përpiqet të ndryshojë humorin rreth negociatave, sipas lajmeve të mira apo të këqija që dëgjon.
Ajo po i bashkangjitet dështimit të mundshëm të hapjes së bisedimeve si një ngjarje shqiptare, njësoj si vrapoi t’i bashkangjitej suksesit, pas votimit pro nga Bungestagu.
Lulzim Basha, i cili shpreson deri në fund tek “Jo” e Holandës, që është edhe atdheu i gruas dhe fëmijëve të tij, tha sot se nëse Holanda dhe Franca thonë “Jo” për Shqipërinë, atëhere qeveria shqiptare është përgjegjëse për mos hapjen e bisedimeve.
I njëjti person një javë më parë, kur Bundestagu votoi për hapjen e bisedimeve me Shqipërinë, edhe pse ka lobuar me para dhe lobistë politik për ta bllokuar, pa pikë turpi doli e tha se Bundestagu votoi pro, pasi PD dhe ai ishin përpjekur që ta bindnin.
Tani që hapja e negociatave nuk është më në dorë tone, kjo është e qartë. Bile siç po shikohet, nuk është më as në dorë të Brukselit, por të dy kryeministrave të dy vendeve të Bashkimit Europian.
Ndaj dhe realisht nuk ka nevojë më për debat të brendshëm. Mjafton që bisedimet po hapen në vitin 2019, për t’u ndjerë të gjithë përgjegjës.
Por meqë Basha nuk rri dot pa folur, ai duhet ta ndajë këtë punë, nëse është nga ata që luftojnë për t’u hapur negociatat, apo ata që lobojnë për të kundërtën.
Meqë bëri sikur kishte lobuar pro në Gjermani, kur Bundestagu vendosi të hapë dritën jeshile, le të hidhet ca ditë në Holandë, se me këtë rast vadit dhe lulet tek shtëpia e tij, dhe t’i bindë holandezët, që nuk jemi vend kriminelësh, dhe Holanda të mos na bllokojë.
Kështu ikën dhe ai fiksimi që kanë në Holandë, se ne çojmë atje vetëm kriminelë, pasi ka dhe familje si ajo e Lulzim Bashës.
E di që është kërkesë e tepëruar, pasi Holanda i merr vendimet për llogari të veta, por opozita duhet ta ndajë mendjen se si duhet të sillet me këtë histori.
Lulzim Basha një ditë bën sikur gëzohet që u hapën negociatat e një ditë gëzohet realisht, kur i duket sikur nuk do hapen.
Edhe nëse ndodh të na bllokojë Franca e Holanda, edhe nëse na japin dritën jeshile, ne nuk kemi më asgjë në dorë. As opozita nuk prish dot punë më shumë se ka prishur.
Ndaj është më mirë ta shijojë në heshtje gëzimin nëse Holanda e Franca na bllokojnë, dhe ta kafshojë gjuhën nëse na japin dritë jeshile. Se të paktën nuk duken qesharakë.
