Kronikë

Humbi jetën pasi ra nga skela, Ergysi do shkonte të jetonte me motrën në Amerikë

               Publikuar në : 15:10 - 19/08/19 M. S

Ergys Brahimi është një nga punëtorët i cili humbi jetën në Tiranë, pas rrëzimit të skelave gjatë rikonstruksionit të një pallati. I ndjeri, dje u përcoll për në banesën e fundit. Mësohet se Brahimi do shkonte për pak kohë në Amerikë, pasi i kishin dalë letrat. Shumë shpejt, së bashku me motrën e cila punonte doktoreshë, do t’iu bashkoheshin prindërve që jetonin në “tokën e premtuar”.

Sot, motrat e tij kanë bërë një postim në rrjetet sociale, ku teksa falenderojnë këdo që iu është gjendur pranë në këto momente tepër të vështira për familjen e tyre, kanë kërkuar nga gjithë ata që e njihnin Ergysin të ndajnë me to foto, video ose kujtime të cilat familjarët nuk i dinë.

“Të dashur miq, kushërinj, shokë. Ne motrat e Gysit duam t’ju falenderojmë për të gjitha mendimet, lutjet dhe ngushëllimet. Vëllai ynë nuk është më mes nesh, por ai është me Krishtin dhe ne do ta takojmë një ditë, por deri sa ajo ditë të vijë, e vetmja gjë që na kanë ngelur janë kujtimet e tij. Ju lutemi nëqoftëse keni foto, video ose kujtime që ne nuk i dimë, ndajini ato me ne. Zoti ju bekoftë të gjithëve! Ela & Lona”, shkruajnë motrat.

Tre ditë më parë, Ergys Brahimaj dhe Orjan Kodra, 36 vjeç, u zunë poshtë nga skela që u shemb nga lartësia e pallatit 13 katësh, për shkak të mungesës së kushteve teknike dhe sigurisë në vendin e punës.

 

 

Kthehu
WhatsApp Denonco ne TT