Vëllai i Rezarta Hajdarit, 19-vjeçares që u gjet e pajetë pak ditë më parë në banesë, dyshon se motra e tij është helmuar nga familjarët e bashkëshortit të saj. Duke kundërshtuar se shkak i vdekjes ka qenë si pasojë e asfiksimit nga mangalli që përdornin për t’u ngrohur në dhomë.
Ai theksoi se do i shkojë deri në fund të vërtetës për vdekjen e saj. Ndër të tjera, Reshit Xibraku deklaroi se kanë bërë tashmë një denoncim në Policinë e Elbasanit, ndaj familjarëve të bashkëshortit të 19-vjeçares, Olsian Hajdarit.
“Ne arsyen do ta gjejmë në polici. Fola me Olsin në telefon dhe e pyeta si qe ngjarja. Ai thotë nga mangalli. Ne do të kërkojmë drejtësi deri në fund. S’do t’i lë rehat. Siç iku motra ime në dhe, do ikë dhe ai! Ne dyshojmë se është vrasje”, tha ai.
Edhe prindërit e Rezartës kanë dyshime të forta se vajza e tyre është helmuar, ndërsa kërkojnë që Policia të zbardhë të vërtetën e kësaj ngjarjeje.
Ekspertiza mjeko-ligjore konfirmoi se Rezarta ndërroi jetë nga helmimi i monoksidit të karbonit. Në një linjë me deklaratën e Olsianit, i cili tha se kishin në dhomë mangallin dhe ai ishte shkaku i vdekjes së bashkëshortes së tij.
