Afro-amerikani George Floyd, i cili vdiq në duart e policisë do të varroset sot në Houston, të Shteteve të Bashkuara.
Sipas mediave të huaja, 46-vjeçari do të varroset pranë nënës së tij. Floyd vdiq më datë 25 maj pasi një oficer policie ushtroi forcë duke i vënë gjurin në pjesën e prapme të qafës, duke bërë që atij t’i merrej fryma.
Ai u ndalua nga policia nën akuzat se kishte krijuar një faturë false, në vlerë prej 20 dollarësh. Vdekja e tij ka shkaktuar protesta masive kundër racizmit në SHBA, të cilat janë përhapur edhe në pjesë të tjera të botës.
Katër policët që kanë marrë pjesë në ndalimin e tij janë pushuar nga puna, si dhe janë akuzuar për vrasje ose bashkëfajësi në vrasje.
