Enkelejda Muçaj është liruar nga detyra e Avokates së Shtetit, duke u zevendësuar nga Brunilda Lilo. Vendimi në fjalë është marrë nga Këshilli i Ministrave, dhe është publikuar dhe në fletoren zyrtare. Kujtojmë këtu se Muçaj u emërua në këtë detyrë me propozim të kryeministrit Edi Rama. Ajo zëvendësoi Artur Metanin, pasi ky i fundit mori postin e kreut të Inspektorit të Lartë të Drejtësisë.
Vendimi
Në mbështetje të nenit 100 të Kushtetutës dhe të neneve 21, pika1, 26, pika 5, shkronja “a”, të ligjit nr. 10018, datë 13.11.2008, “Për Avokaturën e Shtetit”, të ndryshuar, me propozimin e Kryeministrit, Këshilli i Ministrave.
VENDOSI:
Enkelejda Muçaj lirohet nga detyra si Avokat i Përgjithshëm i Shtetit.
Brunilda Lilo emërohet Avokat i Përgjithshëm i Shtetit. Ky vendim hyn në fuqi menjëherë.
Avokatura e Shtetit e drejtuar prej saj, e humbi gjyqin në Arbitrazh me biznesmenin italian Francesco Becchetti lidhur me dëmshpërblimin e kërkuar nga ai për mbylljen e televizionit Agon Channel në vitin 2015. Enkelejda Muçaj ishte e para që e pranoi publikisht se qeveria e humbi këtë proces ndërkombëtar.
Pak ditë më parë, Avokatja e Shtetit duke raportuar në Komisionin e Ligjeve, pranoi humbjen e gjyqit në Arbitrazh me Bechettin dhe gjobën 108 milion euro. Ajo pranoi se qeveria shqiptare shkeli ligjet ndëkombëtare, ‘dhe ne duhet të jemi me fat, pasi gjoba mund të ishte edhe më e madhe’.
Në raportimin në Komisionin e Ligjeve, Avokatja e Shtetit nuk e cilëson si dështim, pasi sipas saj, ai fitoi vetëm 108 mln euro. Avokatja e Shtetit, Enkelejda Muçaj, tregoi historikun e padisë, duke nënvizuar se kjo është një histori suksesi, pasi dëmi mund të kishte qenë dhjetëfish më i madh, ndërsa mazhoranca socialiste e hodhi përgjegjësinë në kurriz të drejtësisë vendase.
Për herë të parë qeveria pranon se ka humbur një proces gjyqësor ndaj Francesco Bechetti-t.
Avokatja e Shtetit, Enkelejda Muçaj nënvizoi se pala shqiptare duhet të paguajë 108 milionë euro. Por nuk duket ta konsiderojë histori dështimi, kur tregon se mund të kishte shkuar edhe më keq. Avokatja e Shtetit dha edhe arsyet se përse Gjykata Ndërkombëtare e Arbitrazhit gjykoi se pala shqiptare kishte shkelur ligjet ndërkombëtare. Muçaj shpjegon edhe reduktimin e faturës që shteti duhet të paguajë për të dëmshpërblyer Becchettin.
