Historia e trishtë e familjes Boçi tronditi të gjithë shqiptarët. Prej tre vitesh, kryefamiljari nuk jeton më, duke lënë në mëshirë të fatit Dhuratën dhe dy vajzat minorene. Kushtet e jetesës ishin sa të tmerrshme aq edhe të rrezikshme. Jetonin të vetme në fshatin Krutje e Sipërme, në Lushnje; në një dhomë të rrënuar.
“Ditën kur ndërroi jetë babai, ishte dita e fundit që unë kisha shpresë. Që i thosha vetës, se gjërat do të bëhen mirë. I kërkova ndihmë Zotit që ta shpëtonte, por ai nuk ma plotësoi. Ndaj edhe tani nuk kam shpresë për asnjë gjë.
Kam tre vite pa e parë. Nuk shkonte të flinte pa më zënë mua gjumi, më mbante dorën gjithmonë. Dhe tani që rri këtu dhe shoh që nuk është me mua, është shumë keq. Ndjehem shumë keq. Do doja që vetëm një herë të më përqafonte,” rrëfente mes lotëve Rosela, vajza e madhe. E cila kishte humbur besimin se jeta do i dhuronte përsëri momente të bukura.
Por, pas thirrjes së bërë nga “Fundjavë Ndryshe”, lajme të mira vijnë për familjen Boçi. Fal kontributit të madh të bamirësit Shkumbin Qormemeti arritëm t’i risjellim buzëqeshjen. Ato nuk do të jetojnë më në atë dhomën e rrënuar që po i shtypte çdo shpresë. Por, në një shtëpi të ngrohtë dhe të sigurt.
Edhe pse vendi ndodhet në një situatë të vështirë, shtëpia është përgatitur në një kohë rekord. Dhe familjes Boçi i është siguruar ushqim për të paktën tre muajt e ardhshëm, me qëllim mos daljen nga shtëpia. Në mënyrë që shëndeti i tyre të jetë i sigurt.
Ndër të tjera, bamirësi Shkumbin Qormemeti njoftoi se së bashku me “Fundjavë Ndryshe” do të sigurojnë edhe bursa studimi për Roselën dhe Elvisën.
Ndryshe nga disa javë më parë, sot dy vajzat kanë besim për të ardhmen dhe shpresë se sërish do të jenë të lumtura.
