Nënkryetari i Partisë Demokratike të Kosovës, njëherësh ministri i Punëve të Jashtme, Enver Hoxhaj, ka thënë se PDK-ja s’ka marrë akoma vendim se si do ta trajtojë mocionin e opozitës për rrëzimin e qeverisë. Ndërsa theksoi se Kosovës i duhet një fillim i ri.
“Ne ende s’kemi një qëndrim se në çfarë forme do të sillemi me mocionin e opozitës”, pohoi Hoxhaj, duke shtuar se “kam përshtypjen që Isa Mustafa s’ka mbështetje brenda partisë së tij”.
Sipas nënkryetarit të parë të PDK-së, mungesa e vendimmarrjes në këtë koalicion qeverisës brenda PDK-së ka krijuar idenë se vendit i duhet një fillim i ri, porse si do të vije ai, ka thënë se do e diskutojnë në parti.
“Duhet ta kemi një start të ri, por si do të duket ai është përtej pikëpamjes time. Të mërkurën në mëngjes do të kemi një mbledhje të Këshillit Drejtues, mbledhje që do t’i japë drejtim zhvillimeve të vendit në të ardhmen”.
“Një koalicioni nuk matet vetëm me qëllime të mira, por me rezultate konkrete dhe pritja më e madhe e qytetarëve është liberalizimi i vizave. Prandaj vendi duhet të ketë një shtysë të re. Ta kemi një ristart, një fillim të ri, por këto janë çështje që duhet të formësohen në parti”, tha Hoxhaj në Zona B të Klan Kosovës.
