Gazetari investigativ, Artan Hoxha, teksa komentoi incidentin e djeshëm në protestën e opozitës, ku u sulmua me grusht kreu i Partisë Demokratike, Sali Berisha, tha se u thye paprekshmëria e liderit të opozitës. Ndër të tjera zbuloi se truproja i Metës ishte i vetmi me armë në protestë.
Hoxha tha në studion e “Abc Live” se incidenti me grushtin në protestë mori vëmendjen nga Samiti BE-Ballkani Perëndimor që u zhvillua dje në Tiranë.
Truprojat e Berishës nuk kishin armë me vete. Për këtë Hoxha tha se Berisha nuk ruhet nga Garda e Republikës për shkak të çështjes së vulës në gjykatë, dhe se nuk është njohur akoma zyrtarisht si lider i PD-së.
“U thye paprekshmëria e Berishës”, tha Hoxha.
Gerti Shehu, 31-vjeç sulmoi kreun e PD-së Sali Berisha, teksa ky i fundit ishte duke marshuar drejt Bulevardit “Dëshmorët e Kombit” për të marrë pjesë në protestë. 31-vjeçari goditi me grusht në fytyrë Berishën, duke e gjakosur. Ai u ndalua menjëherë nga truprojat e Berishës, dhe ndërkohë u dhunua nga mbështetës dhe simpatizantë të PD-së.
