Kryeministri Avdullah Hoti ka paralajmëruar se nëse numri i rasteve vijon të rritet, atëherë në Kosovë mund të shpallet gjendja e jashtëzakonshme.
I ftuar në emisionin Rubikon në Klan Kosova, Hoti u shpreh se lidhur me këtë çështje ka diskutuar edhe me Komitetin për Menaxhimin e pandemisë.
“Tash jemi duke shkuar drejt gjendjes së jashtëzakonshme. Unë sonte kam pasur takim me Komitetin për Menaxhimin e Covidit dhe kemi diskutuar shumë hapur. Mund të jetë vendim shumë jo popullor, por unë jam i gatshëm të shkoj në ekstreme për të ruajtur jetën e qytetarëve”, tha ai.
Hoti tha se më shumë në lidhje me këtë çështje do të diskutohet në mbledhjen e ditës së diel, që është planifikuar me Komitetin.
“Të dielën e kam thirr takimin tjetër të Komitetit për Menaxhimin e Covid-19 për të bërë vlerësimin tjetër të situatës shtesë me disa informata që iu kemi kërkuar që t’i mbledhin dhe t’i vlerësojnë të gjitha institucionet shëndetësore të përfshira dhe pas asaj kam ftuar mbledhjen e Këshillit të Sigurisë për të diskutuar bashkë me anëtarët e Këshillit të Sigurisë nëse duhet të shqyrtojmë shpalljen e gjendjes së jashtëzakonshme”, shtoi ai.
