Kryeministri i Kosovës, Avdullah Hoti ka deklaruar se nuk ka ndërmend të japë dorëheqjen, dhe se informacionet që po qarkullojnë nëpër media janë të pavërteta.
Ai u shpreh se me veprimet e tij, ka treguar gatishmërinë për t’i ofruar vendit ofruar zgjidhje për të gjitha çështjet e ngritura.
Sipas tij, Kosova mund të shkojë në zgjedhje të reja, nëse partitë parlamentare nuk do të gjejnë dot dakordësi për zgjedhjen e presidentit të ri.
Postimi i Hotit në Facebook
Informacionet të cilat po qarkullojnë nëpër media për dorëheqjen time janë të pa vërteta.
Me veprimet e mia kam dëshmuar gatishmëri e përkushtim për të ofruar zgjidhje për të gjitha çështjet e ngritura, duke zhbllokuar madje edhe proceset komplekse nëpër të cilat ka kaluar vendi siç ishte vendimi për vazhdimin e dialogut me parime dhe arritja e marrëveshje së 4 shtatorit në Uashington, hartimi i pakos emergjente dhe asaj për rimëkëmbje ekonomike dhe masat konkrete në menaxhimin e pandemisë Covid -19.
Sa i përket zhvillimeve të fundit pas veprimeve të Dhomave të Specializuara dhe dorëheqjes së ish Presidentit Thaçi, e kam bërë të qartë se partitë parlamentare i kanë dy opsione, të gjejnë zgjidhje për çështjen e Presidentit ose të dakordohen për datën e zgjedhjeve. Por, asnjëherë në asnjë kontekst nuk e kam përmendur dorëheqjen si opsion.
