Kryeministri i Kosovës, Avdullah Hoti, zhvilloi sot një takim online me kryetarët e komunave të vendit, ku në qendër të bisedimeve ishte menaxhimi i situatës së pandemisë.
Gjatë mbledhjes, Hoti iu ka kërkuar atyre që të përgatiten për një valë të re të COVID-19 e cila mund të paraqitet në shtator.
Sipas Express, në këtë takim kanë qenë prezentë edhe ministri Shëndetësisë, Armend Zemaj, dhe ministri i Arsimit, Ramë Likaj.
“Kryeministri Hoti e vlerësoi angazhimin e kryetarëve të Komunave, të cilët i falënderoi për bashkëpunimin dhe bashkërendimin e aktiviteteve për masat shtesë, duke përfshirë edhe aktivizimin e shtabeve emergjente. Po ashtu, ai kërkoi që të bëhen përgatitje për masat e mëtutjeshme nga Komunat për një valë të re, e cila mund të paraqitet në shtator. Në këtë kontekst, u shtrua edhe nevoja e përgatitjeve për fillimin e viti të ri shkollor dhe obligimet e komunave në këtë proces”, thuhet në njoftimin e lëshuar nga zyra e kryeministrit.
