Kryeministri i Kosovës, Avdullah Hoti, shprehet se vetëm njohja reciproke mes Kosovës dhe Serbisë, i normalizon marrëdhëniet mes palëve.
Me anë të një postimi në Facebook, ai thotë se njohja reciproke është tema e vetme që diskutohet, pa cënuar integritetin territorial të Kosovës.
Hoti shton më tej se Kosova mbetet e përkushtuar për dialog, sepse është vend evropian, me orientim të qartë euro-atlantik.
Statusi
Vetëm njohja reciproke në mes të Kosovës dhe Serbisë i normalizon marrëdhëniet në mes të dy vendeve dhe e qetëson këtë pjesë të Ballkanit dhe Evropës. Në çfarëdo takimi që kam pasur dhe do të kem me përfaqësuesit e Serbisë, njohja reciproke është tema e vetme.
Çdo gjë që bisedohet me ta është në funksion të arritjes së marrëveshjes për njohje reciproke, pa cenuar integritetin teritorial apo karakterin unitar të shtetit të Kosovës.
Kosova mbetet e përkushtuar për dialog, sepse është vend evropian, me orientim të qartë euro-atlantik.
Nisur nga kjo qartësi e plotë e procesit, unë nuk do të hezitoj të dialogojmë.
Prandaj, i ftoj forcat politike në Kosovës, pozitë dhe opozitë, të jemi të unifikuar në këtë proces. Gara politike në mes nesh, që duhet të jetë demokratike dhe mbi baza të kushtetutës, mund dhe duhet të zhvillohet për tema të tjera të politikës, ekonomisë, arsimit, shëndetësisë dhe fushave të tjera.