Përfaqësuesja e Maqedonisë së Veriut në Eurovision 2022 ka shkaktuar një debat të fortë, pasi ka hedhur flamurin në tokë në kohën kur bënte fotot. Gjatë ceremonisë së hapjes së festivalit, Andrea Koevska ka hedhur në tokë flamurin maqedonas, teksa po pozonte para fotografëve.
Ndonëse nuk duket si një akt i qëllimtë, por më shumë si një veprim i nxituar për të larguar flamurin, Koevska rrezikon të tërhiqet nga festivali. Radio Televizioni i Maqedonisë së Veriut ka reaguar ashpër pas gjestit të saj, duke e cilësuar si skandaloz. Transmetuesi i Maqedonisë së Veriut tha se dënon ashpër hedhjen e flamurit siç u tregua gjatë ceremonisë së hapjes. MRT i kujtoi audiencës së përgjithshme se në Maqedoninë e Veriut hedhja e një flamuri në dysheme, shihet si shenjë mosrespektimi dhe dënohet me ligj në vend.
“Shërbimi publik nuk qëndron në asnjë mënyrë pas kësaj sjelljeje skandaloze të përfaqësuesit tonë të Eurovizionit, i cili me atë gjest tregoi mosrespektim ndaj simbolit kombëtar, i cili dënohet me ligj.
MRT pret që Andrea t’u kërkojë falje qytetarëve për sjelljen e tillë. Shërbimi publik po shqyrton mundësinë e tërheqjes së saj nga Eurovizioni, ndonëse do të bëhet kujdes që të mos i shkaktohen më shumë dëme MRT-së”.
Marrë shkas nga ky qëndrim, këngëtarja ka shpjeguar situatën ndërsa ka kërkuar falje. “Më lejoni të bëj një deklaratë të shkurtër nga këtu që nga hapja, sepse pashë çfarë shkruhej në media. Unë thjesht nuk e besoj sepse ditët e fundit e vetmja gjë që bëra ishte të lëvizja me krenari dhe të tregoja flamurin maqedonas kudo.
Delegacioni ishte shumë larg meje dhe vendosa në një moment të heq flamurin. Nuk ishte për urrejtje, jam krenare që vij nga këtu dhe prandaj është pak e kotë për mua pse po ndodh kjo. Nuk kisha ndërmend të ofendoja dikë dhe nëse e bëra këtë, kërkoj falje. Unë e mbaj flamurin me vete kudo që shkoj dhe shpresoj se mund ta kalojmë vërtet këtë”.
