Greqia do të zgjerohet deri në 12 milje në Jon. Kjo deklaratë ndezi debate në vendin tonë. Presidenca dhe mazhoranca socialiste janë përplasur në distancë me njëra-tjetrën. Shkak është bërë delimitimi i kufirit detar me Greqinë, i mbetur pezull, por i rikthyer në vëmendje nga Athina.
Historiania Elena Kocaqi thotë se zgjerimi i shtetit helen në veri të Jonit, është tejet problematik për zonën ekskluzive ekonomike të vendit tonë. Ajo tha në “Ora News” se synimet e Athinës zyrtare, mbeten të pandryshuara për të dalë në Karaburun.
“Nuk ka një përcaktim të qartë, sepse Greqia në detin Jon ka një zgjerim drejt perëndimit dhe drejt veriut. Nëse kërkon zgjerim drejt perëndimit, që është drejt Jonit mesdhetar është e drejtë e saj ta bëjë.
Ndërsa në lidhje me zgjerimin e Greqisë në Jon drejt veriut këtu, pastaj është problemi sepse kemi dhe ne zonën ekskluzive ekonomike në Jon e cila në këtë rast nga pretendimet greke vihet në rrezik për arsye sepse edhe në marrëveshjet e mëparshme Greqia ka ngulur këmbë të marrë një zonë shumë të madhe në veri të ishullit të Otonit që e nxjerr Greqinë afërsisht afër Karaburunit.
Dhe për këtë arsye, këtu duhet të ketë kujdes, sepse është një pasuri ekonomike që u përket shqiptarëve dhe në bazë të të drejtës ndërkombëtare dhe të gjithë ligjeve ndërkombëtare, Shqipëria ka një prevalencë përballë ishujve të Greqisë. Ka disa rregulla të caktuara për ndarjen edhe të zonave ekonomike ekskluzive”.
