N’Golo Kante vërteton edhe njëherë se ai është një profesionist i madh dhe një kampion bote me meritë të plotë. Gjatë gjithë turneut, Kante ka qenë i shoqëruar nga një mërzitje e madhe pasi vetëm pak ditë para Botërorit ishte ndarë nga jeta vëllai i tij i madh, Niama.
Lojtari i Chelsea-t pavarësisht dramës në familje, ishte një ndër shtyllat kryesore në mesfushën e Francës. Triumfin në Kupën e Botës padyshim ai ia dedikon vëllait të tij, por me shumë mërzi përbrenda pasi nuk arriti ta ngrinte para tij.
Vëllai i tij Niama ka vdekur pas një arresti kardiak përpara se të fillonte turneu. Një pjesëtar i një familjeje të madhe të përbërë nga katër motra dhe katër vëllezër, Kante është mbështetur nga familja për të kaluar këtë moment të vështirë të jetës së tij.
