Kryeministri Rama ka thyer heshtjen dhe ka folur lidhur me akuzat për këngëtarin Goran Bregoviç, i cili zhvilloi një koncert në Festën e Birrës. Sipas komenteve që po qarkullojnë, Rama ka barazuar Dua Lipën me Goran Bregoviçin.
Në kundërpërgjigje, ai thotë se deklarata e tij është deformuar. Kryeministri e konsideron si histeri fashiste që as nuk e mbron, as e nderon, po vetëm e turpëron shqiptarinë e cila s’mund të jetë kurrë shembëlltyrë e urrejtjes!
Statusi
NJË KOMENT PËR KOMENTET E KINSE PATRIOTËVE
Ashtu siç bënë Bregoviçin kriminel serb pa asnjë fakt, tani sokëllijnë që unë paskam barazuar Dua Lipën me të! Dhe histeria vazhdon por jo, unë nuk kam barazuar hiçfare Dua Lipën me Goran Bregoviçin, po kam thënë me një shembull të vërtetën e hidhur se të barabartë, njësoj krejt janë ata që shajnë e mallkojnë, në serbisht a në shqip, artistët e sportistët me emër të palës tjetër! Histeri fashiste që as nuk e mbron, as e nderon, po vetëm e turpëron shqiptarinë, e cila s’mund të jetë kurrë shembëlltyrë e urrejtjes!
