Regjisori i njohur, Robert Budina mes britmave dhe zërit që i ngashërehej, ka shpërthyer në akuza ndaj Policisë së Shtetit dhe sjelljes së saj.
Në prani të kamerave, ai i është drejtuar policëve që qëndronin para tij, pasi këta të fundit e kishin shtyrë, ndërsa ai tha se nuk mund të silleshin kështu me një intelektual.
“Kam që në ‘90 që rri në rrugë. Ça i kemi bërë ne këtyre njerëzve?! Më shihni të armatosur?! Si mund të vijë polici dhe të më thotë ‘ik’?! A keni vëllezër? Motra? Prej jush e kam çuar fëmijën jashtë shtetit se nuk jeton dot këtu. Ça turpi jeni! Ku i keni armët? Si më shtyni? Ku e gjeni kurajon?! Hiqe atë armë dhe trego se je qytetar. T’ju vijë turp. S’mund të gjuani. Kam 4 vjet që ne do të fitojmë me kulturë. Ju detyruat njerëzit të gjuajnë me gurë, të gjuajnë me armë, të kthehen në dhunues.”, tha Budina i përlotur.
Dita e dytë e protestës për vrasjen e 25-vjeçarit, Klodian Rasha u shoqërua me dhunë dhe përplasje midis protestuesve dhe forcave të policisë.
Kjo detyroi Ministrin e Brendshëm, Sandër Lleshajn që të japë dorëheqjen e parevokueshme nga posti.
Klodian Rasha u ekzekutua këtë të martë, më 8 dhjetor. Ngjarja ka ndodhur në zonën e Laprakës në kryeqytet, pasi i riu kishte dalë orët e para të mëngjesit jashtë banesës së tij, duke thyer orën policore.
