Ministrja e Shëndetësisë, Ogerta Manastirliu, ka konfirmuar se kufijtë do të hapen nga data 1 qershor dhe do të hiqet karantina dy javore për të gjithë personat që vijnë nga jashtë. Autoritetet e shëndetësisë kanë vendisur që të kenë hapje të rakorduara me marrëdhënie reciproke, me vendet e tjera.
“Hiqet karantina dy javore dhe lejohet qarkullimi i lirshëm i qytetarëve. Autoritetet e shëndetësisë kanë vendosur që të fillojmë të hapemi në disa drejtime. Kryesisht do të jenë hapje të rakorduara me marrëdhënie reciproke me vendet e tjera. Ne fillojmë nga data 1 hapjen e kufijve, besoj se edhe vendet e tjera brenda muajit maj do të shpallin datat e tyre”, u shpreh Manastirliu në emisionin “Real Story”.
Një tjetër lajm i mirë është se vendet e BE ku hyn dhe Shqipëria, do t’i hapin kufijtë mes tyre. Gjatë këtyre ditëve do të jetë gati protokolli për transportin detar, ajror e tokësor. Ministrja tha mbrëmjen e djeshme se asnjë vend evropian nuk është epidemiologjik, pra që të detyrojë karantinën. Greqia do të ketë një dalje brenda muajit maj, ku do të heqë dhe karantinën.
“Ajo që dihet deri më sot edhe nga vendet e BE është se do të kemi një hapje të vendeve evropiane, por edhe të vendeve të tjera, ku hyn edhe Shqipëria. Do të përcaktohen vendet që nuk kanë barrë epidemiologjike, që do të thotë se humbet karantinimi dy javor. Asnjë vend evropian nuk është epidemiologjik, pra që të detyrojë karantinën. Greqia do të ketë një dalje brenda muajit maj, ku do të heqë dhe karantinën.
Po punojmë me Ministrinë e Transportit dhe brenda këtyre dy ditëve, miratojmë protokollin në lidhje me transportin ajror, detar dhe kufitar. Besoj që në fillim të javës tjetër, do të kemi lajme sa i përket kufijve ajrorë dhe detarë”, shtoi Manastirliu.
