Ditën e sotme është hedhur shorti i turit të parë kualifikues të Europa League.
Në hedhjen e goglave Tirana ka gjetur skuadrën izraelite, Maccabi Tel Aviv.
Kjo përballje pritet të jetë shumë e vështirë për bardheblutë, të cilët këtë sezon do të provojnë edhe shijen e hidhur të të luajturit në Kategorinë e Parë.
Ardhja e trajnerit të ri Ze Maria, ka ngjallur shpresa të reja të ekipi kryeqytetas, por përballë një ekipi si Macabi Tel Aviv, gjithçka bëhet edhe më e vështirë.
Ndërkaq, Partizani do të luajë kundër bullgarëve, të Botev Plovdiv ndërsa Skënderbeu do të sfidojë skuadrën andorase të Sant Julias.
Këto dy ndeshje duken të lehta për skuadrat shqiptare, megjithatë, gjithçka do të varet nga ajo që do të japin në fushë lojtarët e Partizanit dhe Skënderbeut.
Ndeshjet e para të këtij raundi kualifikues të Europa League do të zhvillohen më 29 qershor ndërsa ato të kthimit më 6 korrik.
Ajo që e bën të veçantë kompeticionin e Europa League për këtë vit është ndarja e ekipeve pjesëmarrëse në 10 grupe me nga 10 skuadra nga të cilat 5 prej tyre cilësohen si koka shorti dhe 5 të tjerat më pak të vlerësuara në renditjen e përgjithshme të UEFA-s.
