Pak çaste më parë, Hashim Thaçi dha dorëheqjen si president i Kosovës. Në një deklaratë për mediat, Thaçi njoftoi se Dhomat e Specializuara në Hagë, i kanë konfirmuar aktakuzën për krime lufte, dhe krime kundër njerëzimit.
Pas këtij vendimi, një reagim është përcjellë nga ana e Ramush Haradinajt. Kryetari i Aleancës për Ardhmërinë e Kosovës, Ramush Haradinaj shprehet se Thaçi, Veseli dhe të gjithë bashkëluftëtarët që po përballen me gjyqësinë ndërkombëtare, duhet të kenë përkrahjen e qeverisë së Kosovës, pa asnjë rezervë.
Statusi
Të nderuar qytetarë të Kosovës,
Ushtria Çlirimtare e Kosovës, ishte faktor uniteti në vitet e krenarisë dhe sakrificës. Sot, të gjithë ne si popull, por edhe si liderë politik, duhet të tregojmë unitetin kombëtar, në rrethanat e reja të krijuara.
Presidenti Thaçi, kryetari Veseli dhe të gjithë bashkëluftëtarët e mi, që po përballen me gjyqësinë ndërkombëtare, duhet të kenë përkrahjen tonë dhe të qeverisë së Kosovës, pa asnjë rezervë.
Duke besuar fuqishëm se do të vërtetohet pafajësia e tyre, Republika e Kosovës do të tejkalojë faqebardhë edhe këtë sfidë.
RH
Në muajin korrik, Thaçi u morr në pyetje nga prokurorët në Hagë për katër ditë me radhë, ku ka folur për rolin e tij, përgjegjësitë gjatë luftës. Prokuroria e Specializuar në Hagë heton krimet e pretenduara të pjesëtarëve të Ushtrisë Çlirimtare të Kosovës, të kryera kundër pakicave etnike dhe rivalëve politikë që nga janari i vitit 1998, e deri në dhjetor të vitit 2000.
