Kryeministri në largim i Kosovës, Ramush Haradinaj i ka bërë thirrje kreu të Vetëvendosjes, Albin Kurti që të gjejë një formulë për të krijuar shumicën parlamentare.
Në një prononcim për mediat kosovare, Haradinaj u shpreh se Kurti duhet të gjejë një zgjidhje për situatën e krijuar, pasi sipas tij Kosova po rrezikon shumë gjëra për shkak të mosmarrëveshjeve mes LVV dhe LDK.
Haradinaj ia bën të qartë Kurtit që ose të gjejë një zgjidhje në lidhje me mosmarrëveshjet ose të hapë rrugë.
“Unë pres nga z. Kurti që t’i thërret ndërgjegjes së vet. Ose ta gjen formulën me bë shumicën, në këtë rast me LDK-në, sepse unë s’jam palë e negociatave, ose të hapë rrugë. Të deklaron çka i propozon Kosovës fituesi i zgjedhjeve në këtë rast. Le të deklaron për çka është. A është për një qeveri teknike, a është për një qeveri tjetër, a është për të shkuar në zgjedhje. Por diçka duhet t’i thotë Kosovës nuk mund ta mbajë vjerr. Nuk po e them këtë me nxënë ngushtë Kurtin, sepse Kosova është e zënë ngushtë. Detyra e qeverisë janë në krizë, shiheni procesin. Unë jam i detyruar t’i them këto për shkak se unë më së miri e di se jam kryeministër në detyrë dhe jam përgjegjës. Dhe unë po i tregoj z.Kurtit se nuk është mirë të vonohet. Të lutëm mos u vono, ose krijo shumicën, ose jepi epilog kësaj gjendjes. Sepse jemi ka rrezikojmë më shumë sesa një parti. Pra jemi ka e rrezikojmë funksionimin e vendit”, tha ai.
Haradinaj deklaron se e ka shumë të vështirë mbarëvajtjen e qeverisë, për shkak se nuk ka fuqi vendimmarrëse. Ai fajëson Kurtin dhe partinë e tij për mos arritjen e një marrëveshje, në një kohë kur kanë kaluar më shumë se 2 muaj nga zhvillimi i zgjedhjeve.
“Është me rëndësi të madhe që të kemi një epilog të këtij procesi për shkak se qeverisja më tutje vetëm sa do të bie në kualitet. Kjo për shkak se një qeveri në detyrë e ka të pamundur që të kryejë disa funksione që janë shumë me rëndësi. Psh, ne nuk kemi drejt me aprovua ligje edhe pse ka një parlament të zgjedhur. Ne kemi një qeveri kujdestare por është problem vazhdimi i gjendjes kështu. Është e dëmshme kjo vonesë dhe shkakton dëme serioze në qeverisje dhe në kualitete të tjera të jetës. Pra duhet t’i japin një epilog gjendjes. Krejt Kosova pret nga Kurti dhe VV-ja epilog, cili do që të jetë ai. Por mbajtja e një gjendje në emër të një negocimi pa kufij nuk është veprim i mençur. Duhet të jetë i përgjegjshëm. Nuk jam palë e interesit në asnjë variant, por duke qenë kryetar qeverie në detyrë unë i shoh pasojat për Kosovën.
Tani edhe unë kam frikë, jo pse unë s’dua të punoj, por kam frikë nëse kjo situatë vazhdon gjatë. Pra kam frikë për Kosovën jo për vete dhe AAK-në. Nëse fituesi i zgjedhjeve nuk e merr mandatin nuk i respekton afatet, pra nuk e kuptoj këtë gjendje. Kjo për mua është tepër e pakuptueshme. Përveç që është e pakuptueshme është edhe e rrezikshme. Mendoj që kjo qasja e z.Kurtit, vonesat, nuk janë në rregull. Është kuptuar ndoshta derisa nuk është certifikuar rezultati dhe deri sa nuk është konstituua parlamenti, por tash e tutje është problem kjo gjendje”, tha Haradinaj.
