Ramush Haradinaj, kandidati për kryeministër i koalicionit PDK-AAK-Nisma, i mbahet fort qëndrimit të tij kundër “Asociacionit të Komunave me Shumicë Serbe”.
Në një intervistë për DË, ai ka përsëritur se, nëse do të jetë në krye të qevrisë së re të Kosovës, nuk do të lejojë zbatimin e marrëveshjes së Brukselit për themelimin e “Asociacionit” me argumentin se është antikushtetuese, referuar edhe vendimit të Gjykatës Kushtetuese mbi këtë çështje.
“ Nuk mund ta zbatojmë marrëveshjen e Brukselit në këtë aspekt, sepse Gjykata Kushtetuese e Kosovës ka gjetur se kjo marrëveshje nuk është në frymën kushtetuese të Kosovës. Pas këtij vendimi të Gjykatës Kushtetuese, ne duhet të jemi të disiplinuar dhe ta zbatojmë Kushtetutën e Kosovës. Kushtetuta jonë ka paraparë mundësinë e organizimit të asociacioneve që mund të jenë organe vetëm koordinuese, por jo vendimmarrëse dhe s‘ka veprimtari ekzekutive”, është shprehur Haradinaj.
Refuzimi i marrëveshjes në fjalë, përcaktimi i kufirit Kosovë- Malin e Zi në Qakorr dhe krijimi i menjëhershëm i Ushtrisë së Kosovës, janë tre shtyllat kryesore mbi të cilat Haradinaj ka mbështetur fushatën e tij për zgjedhjet e kësaj të diel.
