Kryeministri i Kosovës, Ramush Haradinaj nuk do të marrë pjesë sot në Samitin 100, i cili do të mbahet në Shkup dhe do të jenë të pranishëm homologë të vendeve të Ballkanit Perëndimor.
Zyra e kryeministrit ka njoftuar se kjo bëhet për shkak të axhendës së paracaktuar në Kosovë, dhe jo për të shmangur takimin me kryeministrin e Malit të Zi, siç raportuan disa medie:
“Mosshkuarja në Shkup e kryeministrit Haradinaj nuk ka të bëjë asgjë me atë se kinse ai nuk dëshiron ta takojë kryeministrin e Malit të Zi, siç raportuan disa portale në Prishtinë”, thuhet ndër të tjera në komunikatën e zyrës për media të kryeministrit Haradinaj.
Madje, në komunikatë njoftohet se kryeministri Haradinaj do t’i bëjë ftesë zyrtare për ta vizituar Kosovën kryeministrit maqedonas, Zoran Zaev dhe ai do ta vizitojë Shkupin në një të ardhme, si dhe nuk e përjashton mundësinë e vizitës edhe në Podgoricë.