Kryeministri kosovar Ramush Haradinaj është i gatshëm të vizitojë Preshevën, siç e pohoi ai vetë në një intervistë për portalin Presheva Jonë.
“Do të vijë dita e vizitave në Serbi, edhe në Beograd pse jo”. Sipas portalit, kryeministri kosovar ka marrë një ftesë nga drejtuesit lokalë për të qenë i pranishëm në manifestimin tradicional “Takimet e Vendlindjes 2018” në fillim të majit ku i ftuar është edhe presidenti i Kosovës Hashim Thaçi. Por Haradinaj nuk e përcakton saktë nëse do të jetë apo jo i pranishëm. Autoritetet serbe kanë prej vitesh në fuqi një urdhërarrest ndaj Haradinajt dhe Thaçit. Drejtësia serbe i akuzon ata për krime lufte ndaj serbëve të Kosovës, gjatë konfliktit të viteve 1998 – 1999.
Këtë e konfirmoi edhe ministri i brendshëm i Serbisë Nebojsha Stefanoviç, i cili në një intervistë për të përditshmen beogradase “Kurir” u shpreh se nëse Haradinaj shkel në territorin serb, ai do të arrestohet pa asnjë diskutim.
Dhjetorin e kaluar, Interpoli hoqi urdhërarrestin ndërkombëtar për Haradinajn që qëndronte në fuqi me kërkesë të autoriteteve serbe, edhe pse nga Gjykata e Hagës ishte shpallur i pafajshëm ndaj akuzave për krime lufte që në 2012-ën.
