Kryeministri i Kosovës, Ramush Haradinaj tha se së shpejti ambasadorë që do të vijnë nga minoriteti serb do të përfaqësojnë Kosovën në botë. I ftuar në emisionin “Slobodno Srpski” në gjuhën serbe të RTK-së, Haradinaj shpjegon se në çdo institucion minoritetet duhet të përfaqësohen me 10 për qind.
Gjithashtu, ai ka folur rreth punëve që ka bërë deri më tani në krye të Qeverisë së Kosovës.
“Ashtu siç e thotë edhe ligji, në çdo institucion minoritetet duhet të përfaqësohen me 10 për qind”, tha Haradinaj. Kryeministri ka pohuar gjithashtu se do të kemi serb të punësuar edhe në KEK.
Haradinaj ka folur edhe për periudhën e gjykimit në Hagë, ku ka thënë se ka takuar të gjithë liderët serbë, Sllobodan Milosevicin e Vojislav Seselin. Në pyetjen se ku gjenden serbët e zhdukur gjatë luftës në Kosovë, Haradinaj pohoi se nuk e di, por se që është duke punuar në zbardhjen e rasteve.
