Gazetari Klodian Tomorri ka hedhur akuza ndaj Ministrisë së Bujqësisë, drejtuar nga Bledi Çuçi, për kostot e larta financiare që ky institucion planifikon të kryejë për organizimin e një panairi për punën e tokës.
Përmes një statusi në “Facebook”, Tomorri ka nxjerrë “faturën” e kostos së këtij aktiviteti dyditor, e cila do të kushtojë 19.7 milionë lekë të reja (165 mije euro).
Kjo shifër konsiderohet e tepruar nga ana e gazetarit, teksa e shoqëron me nota ironizuese: “Ministri i Bujqësisë me profesion jurist, bashkë me këshilltarët e tij, njeri psikolog, tjetri mësues dhe i fundit muzikant do mbledhin ca fermerë dhe do promovojnë punimin e tokës. D.m.th. hajde baba të të tregoj arat. Këtu pjell mushka përfundimisht”.
Postimi i Klodian Tomorrit:
Bëmat e Rilindjes nuk rreshtin asnjëherë së të mahnituri. Perla e radhës është e Bledi Çuçit, ministrit të Bujqësisë.
Muajin tjetër Ministria e Bujqësisë do të zhvillojë një panair dy-ditor me temë “Shqipëria punon tokën”.
Ky aktiviteti dy ditë do t’u kushtojë qytetarëve shqiptare 19.7 milionë lekë të reja ose 165 mije euro. Për dy ditë. Se do vënë stenda, do hanë do pinë verëra, gjëra plot dhe do t’i rruajnë 165 mije euro aty.
Por kulmi i ironisë është aktiviteti në vetvete. Ministri i Bujqësisë me profesion jurist, bashkë me këshilltarët e tij, njeri psikolog, tjetri mësues dhe i fundit muzikant do mbledhin ca femerë dhe do promovojnë punimin e tokës. D.m.th. hajde baba të të tregoj arat. Këtu pjell mushka përfundimisht.
Si nuk doli një herë një ministër financash t’ua presë duart këtyre zyrtarëve të shtetit dhe administratës kur i fusin tek buxheti për këto traplliqet si ky aktiviteti. Si shushunja, për çdo gjë sulm buxhetit.
Gjeni një njeri me gërshërë në dorë nja tre muaj. Të bëjë vetëm një gjë: kush zgjat duart te buxheti fap, prerje gishtash. Vetëm kështu zënë mend se nuk ndalen ndryshe.
