Ish-prokurori Shkëlqim Hajdari, ka komentuar situatën politike në vend pas zgjedhjeve parlamentare të 25 prillit.
I ftuar në emisionin ”Shqip”, Hajdari e cilësoi si diçka pozitive, faktin që Partia Demokratike iu drejtua institucioneve për të bërë transparencën në lidhje me rezultatin e zgjedhjeve.
Më tej, Hajdari shtoi se ankimimet e Partisë Demokratike do të shërbejnë për të kuptuar nëse ka shkelje, dhe nëse ka ndodhur një gjë e tillë, atëherë përgjegjësit do të penalizohen.
Hajdari deklaroi se kjo do t’i shërbejë KQZ-së dhe partive politike për të kuptuar se çfarë mund të përmirësojnë për zgjedhjet e ardhshme.
Sipas tij, tashmë është bërë certifikimi de facto i zgjedhjeve dhe ka mbetur vetëm de jure, pra nga ana formale.
Shkëlqim Hajdari: Opozita ka bërë mirë që i është drejtuar institucioneve për të bërë transparencën në zonat ku mendon se vota është vjedhur, devijuar, manipuluar, etj. Sapo kanë nisur të dalin rezultatet e para që nuk janë shumë të qarta në kuptimin e devijimit të votës dhe vjedhjes së saj. Kjo sipas meje ka tre të mira. E para që opozita pavarësisht luftës politike, i është drejtuar institucioneve, e dyta nëse ka shkelje që kanë devijuar, përgjegjësit duhet të penalizohen.
Devijimi është shumë i madh dhe rishikimet e mandateve dhe e treta të na shërbejë të gjithëve Komisionit Qendror, partive politike dhe ne të tjerëve, se çfarë duhet të përmirësojmë në zgjedhjet e ardhshme. Certifikimi i zgjedhjeve de facto është bërë, janë rezultatet sa kanë marrë partitë politike, vetëm de jure që është anë formale. Hapja e kutive të votimit dhe veprimet e tjera të KQZ-së e shpejtojnë në kohë dhe kjo është mirë se në fund të fundit, Shqipëria ka nevojë për qeverisje, Partia Demokratike duhet të justifikojë humbjen sepse sipas saj ka patur parregullsi.
