Nëse kishit menduar se anëtarësimi në Bashkimin Evropian është krejtësisht falas jeni të gabuar. Unioni nuk ka ndërmend të pranojë asnjë shtet në bashkësinë e vetë pa shqyrtuar më parë të gjitha përfitimet e veta. Ndoshta për ndonjërin mund të duket absurde por këtë e pranoi vetë komisioneri për zgjerim i Bashkimit Evropian, Johannes Hahn. Komisioneri Hahn e bëri të qartë se BE-ja do të pranojë anëtare të reja vetëm kur të dyja palët të përfitojnë nga ky proces.
“Në rrugën drejt BE-së, nuk ka shkurtesa apo bileta falas dhe kjo vlen për të gjitha vendet“, tha Hahn në konferencën për zgjerim, të organizuar nga Komitetit për Bashkëpunim Rajonal.
Ai theksoi se zgjerimi i mëtejshëm i BE-së është edhe në interes të institucioneve evropiane, sepse bëhet fjalë për krijimin e stabilitetit, marrëdhëniet e fqinjësisë së mirë dhe pajtimin.
“Partnerët tanë në Ballkanin Perëndimor e dinë shumë mirë se do të vijë deri te zgjerimi vetëm nëse të dyja palët përfitojnë“, tha Hahn, shkruan rel.
“Të gjitha çështjet dypalëshe duhet të zgjidhen në mënyrë të detyrueshme para pranimit“, theksoi Hahn.
Sipas tij, Strategjia për Ballkanin Perëndimor e bën të qartë se rajoni duhet të bëjë reforma dhe ndryshime thelbësore.
